Шүдээ цайруулахын тулд нүүрстэй оогоор шүдээ угаах, ургамлын тосоор амаа зайлах, жимсний хальсаар шүдээ зүлгэх зэрэг нь хэр үр дүнтэй вэ?

Цасан цагаан шүд нь амжилттай яваа хүний имиж гэсэн ойлголт хөгжингүй орнуудад байдаг байсан бол манайд ч одоо ийм ойлголттой болоод байна. Иймд хүмүүс шүдээ ямар нэгэн аргаар цайруулж цасан цагаан инээмсэглэлээр нүүрээ гийгүүлэхийг эрмэлздэг нь нууц биш. Шүд хэрхэн цайруулах талаар өнөө үед интернэтийн орчинд төрөл бүрийн мэдээлэл байх бөгөөд нүүрс агуулсан шүдний оогоор шүдээ угаах, ургамлын тосоор амаа зайлах, жимсний хальсаар шүдээ зүлгэх зэрэг аргуудын талаар зөвлөгөөг хэн бүхэн харсан, сонссон байх. Тэгвэл эдгээр мэдээллүүд үнэнд хэр нийцэх талаар Австралийн Сидней хотын шүдний гоо сайхны (cosmetic dentist) Люк Кронин эмчийн Dailymail Online веб хуудсанд тавьсан зөвлөгөөг  хүргэж байна.

 

Идэвхжүүлсэн нүүрс агуулсан шүдний оо

Энэ нь идэвхжүүлсэн нүүрс бүхий шүдний оо ашиглан шүдээ угааж цайруулах аргачлал бөгөөд идэвхжүүлсэн нүүрс нь капсулд савласан эсвэл нунтаг байдлаар ирдэг. Үүнийг усаар зуураад шүдний оотой хольж шүдээ угаана.

Энэ аргачлалын гол зарчим нь идэвхжүүлсэн нүүрс нь кофе, цай болон улаан винонд агуулагддаг шүдний гадаргууд наалдаж өнгийг өөрчилдөг танин хэмээх нэгдэлийг шингээж авахад чиглэгддэг. Мөн идэвхжүүлсэн нүүрсэнд агуулагдах бусад нэгдэлүүд нь амны хөндийн эмгэг төрөгч нянгуудыг устгаснаар амны эвгүй үнэрийг арилгадаг гэж үздэг.

Хэдийгээр өнөөдөр худалдаанд гайхамшигтай цайруулах шинж чанартай гэж рекламдаж буй төрөл бүрийн идэвхжүүлсэн нүүрс худалдаалагдаж байгаа ч Люк Кронин  эмч энэ аргачлал нь хүний биеийн эрүүл мэнд болон шүдэнд сайн эсэх талаар шинжлэх ухааны нотолгоо хангалттай биш байгааг анхааруулж байна.

“Энэ аргачлал нь хүмүүсийн анхаарлыг татаад байгаа шиг тийм аюулгүй аргачлал мөн үү? гэдэг нь одоо ч тодорхой бус төдийгүй оонд агуулагдах нүүрс нь шүд болон буйлыг хэт их үрж гэмтээдэг байж болзошгүй” гэж тэрээр хэллээ.

 

Ургамлын тосоор амаа зайлах

Энэ аргачлал нь хоёр хоолны халбага хэмжээний ургамлын тосоор ам зайлагчийн нэгэн адил амаа зайлах явдал бөгөөд энэ нь энэтхэгийн аюурведийн анагаах ухааны онолын дагуу ургамлын тосонд агуулагдах нэгдэл нь амны хөндийд агуулагдах нянгийн гаралтай хорт нэгдэлүүдийг зайлуулдаг гэсэн ойлголтод үндэслэгдсэн. 20 минут орчим амаа зайлсаны дараа аман доторх эвгүй үнэр, амт алга болно гэж үздэг.

Люк Кронин  эмчийн хувьд энэ аргачлалыг хурцаар шүүмжлээд байдаггүй ч өөрөө энэ аргыг хүмүүст зөвлөдөггүй. “Хэрэв та энэ аргыг хэрэглэх гэж байгаа бол үүний талаар одоогоор ямар нэг сөрөг  мэдээлэл байхгүй гэдгийг хэлэхэд таатай байна. Гэвч миний хувьд амаа зөвхөн ургамлын тосоор зайлсанаар амны хөндийн эрүүл мэндийн шаардлагыг бүрэн хангана гэж хэлэхгүй” гэж тэрээр анхаарууллаа.

 

Жимсний хальсаар шүдээ үрэх

Жимсний хальсны ашиг тусын талаар шүтэн бишрэгчид жүржийн болон гадил жимсний хальсаар шүдээ зүлгэснээр шүдний гадаргуу дээр тогтсон өнгө хувиргагч нэгдлүүдийг хялбархан арилгах боломжтой гэдэгт итгэлтэй байдаг. Харин Люк Кронин эмчийн хувьд энэ аргачлалд тийм ч итгэлтэй байдаггүй. Хэдийгээр энэ аргачлал нь нэг талаас шүдэнд ямар нэгэн аюул, эрсдэлгүй мэт харагдавч үр дүнтэй эсэх талаар эмнэлзүйн баримт нотолгоо байхгүй гэнэ. Тэрээр нэн ялангуяа жүржийн болон нимбэгийн хальсаар шүдээ зүлгэхдээ болгоомжлох хэрэгтэйг анхаарууллаа.

“Гадил жимсний хальс нь үндсэндээ аюулгүй боловч жүржийн болон нимбэгийн хальс нь өөртөө хүчил агуулдаг тул шүдний гадаргууг гэмтээж болзошгүй гэдгийг анхаарах хэрэгтэй” гэж тэрээр хэллээ.

 

Гэрийн нөхцөлд ашиглаж болох дээрх аргуудаас илүү ямар арга хамгийн үр дүнтэй вэ гэсэн асуултанд Люк Кронин эмч өдөр тутам ашиглаж болох амны эрүүл ахуйн бүтээгдэхүүнүүдийг хэрэглэхийн зэрэгцээгээр шүдний эмчид хандаж мэргэжлийн цэвэрлэгээ, өнгөлгөө, цайруулалт хийх нь илүү үр дүнтэй гэж зөвлөлөө. 

 

Эх сурвалж: Dailymail.co.uk

 

 

Бусад мэдээ

Шүд цайруулах материалуудын тухай Cochrane review-ээс
1980-аад оны дунд үеэс АНУ-ы хэмжээнд хэвлэл мэдээллийн хэрэгсэлээр шүд цайруулагчийн сурталчилгаа явж эхэлсэн байдаг. Шүд цайруулах бодисууд нь амны хөндийн арчилгааны бүтээгдэхүүнүүд дотроос хамгийн их борлуулалттай бүтээгдэхүүн бөгөөд хүн амын дундах цагаан шүдтэй болох гэсэн хүсэл эрмэлзэл жил ирэх тусам өсөн нэмэгдсээр байна.
2020-07-23 21:19
Шүдний эмчээс өөр мэргэжилтэн шүд цайруулах эмчилгээг хийх эрхгүй болохыг шүүхээс баталгаажуулж өглөө
Шотландийн гоо сайхан ч Caroline Sumpter нь Dentawhite in Glasgow-аас  Megawhite Teeth Whitening Licence худалдан авах үедээ тэрээр ямар нэг хууль бус зүйл хийж байгаагаа мэдээгүй байсан байна. Харин тэрээр энэ нь хууль бус гэдгийг мэдэх үедээ компаниас яаравчлан мөнгөө буцааж авахаар шаардсан боловч тус компани түүнд татгалзсан хариу өгсөн байна. Өнгөрсөн долоо хоногт түүний ийнхүү зарга хийсний ачаар Мужийн шүүх зөвхөн усгай зөвшөөрөлтэй шүдний эмч л ганцхан шүд цайруулах үйлчилгээ эрхлэх болохыг хуулийн дагуу дахин баталгаажуулж өглөө.
2020-07-23 21:16
Шүд цайруулалтын тухай бид юу мэдвэл зохилтой вэ?
Шүд цайруулалтын тухай бид юу мэдвэл зохилтой вэ? Цасан цагаан шүд. Мэдээж ийм шүдтэй болохыг олон хүмүүс ялангуяа эмэгтэйчүүд их  хүсдэг.  Мэдээж үүнд олон нийтийн мэдээллийн хэрэгсэлээр гарч буй рекламууд түлхэц үзүүлдэг. Цагаан тэгээд гоё шүдтэй байх нь тухайн хүн хэр зэрэг хөрөнгөтэй тэгээд нийгэмд хэр зэрэг байр суурь эзэлсэн болохыг мөн  тэрээр өөртөө хэр зэрэг арчаатай вэ гэдгийг илтгэдэг. Гэвч рекламанд яаж ийм болсоныг  бас ямар эрсдэл гарч болохыг, туршлагатай эмчээр хийлгэхгүй бол цашдаа юу болж болохыг мэдээж үзүүлдэггүй.
2020-07-23 20:38