Шүд цайруулалтын тухай бид юу мэдвэл зохилтой вэ?
Цасан цагаан шүд. Ийм шүдтэй болохыг олон хүмүүс ялангуяа эмэгтэйчүүд илүү их хүсдэг. Мэдээж үүнд олон нийтийн мэдээллийн хэрэгсэлээр гарч буй рекламууд үүнд түлхэц үзүүлж байгаа. Цагаан тэгээд гоё шүдтэй байх нь тухайн хүн хэр зэрэг хөрөнгөтэй, нийгэмд хэр зэрэг байр суурь эзэлсэн болохыг мөн өөртөө хэр зэрэг арчаатай вэ гэдгийг илтгэдэг үзүүлэлт болсон гэдэгт хэн ч маргахгүй. Гэвч реклам сурталчилгаанд шүд яаж ийм цагаан болсоныг бас шүд цайруулалтын улмаас ямар эрсдэл гарч болохыг, туршлагатай эмчээр хийлгэхгүй бол цаашдаа юу болж болохыг үзүүлдэггүй.
Тиймээс шүд цайруулах гэдэг нь хариуцлагатай, эрсдэлтэй ажилбар тул түүний улмаас гарах таагүй байдал хүндрэлийг шийдэж чадах туршлагатай шүдний эмчээр л хийлгэх ёстой гэдгийг ойлгох хэрэгтэй. Сүүлийн үед гоо сайхны салонууд шүд цайруулна гэсэн реклам явуулж байгаа. Шүд цайруулалтын улмаас үүссэн шүдний хүндрэл бэрхшээлийг ердийн гоо сайханч шийдэж чадахгүй нь хэнд ч ойлгомжтой.
Шүдний эмч нарын мэргэжлийн түвшний ойлголтоор бол цасан цагаан шүд гэдэг нь тухайн хүний биеийн эрүүл мэнд сайн байгааг илтгэх үзүүлэлт биш юм. Энгийн хүмүүс шүдийг арьстай холбож харьцуулж ойлгох гээд байдаг. Цагаан нөсөө толбогүй арьс бол мэдээж тухайн хүний эрүүл мэндийг илтгэнэ. Гэвч шүд бол тийм биш гэдгийг ойлгох хэрэгтэй. Шүдний өнгө нь шар ч гэсэн биеийн эрүүл мэнд асуудалгүй хүмүүс олон бий. Иймд шүдний өнгөд хамгийн их нөлөөлдөг хүчин зүйл нь ерөнхий биеийн эрүүл мэндийн байдал бус тухайн хүний хэрэглэж буй хоол хүнс, ууж буй ундаа юм. Хоол хүнс болон ундаанд агуулагдах будагч бодисууд нь шүдний өнгийг өөрчлөхөд шууд нөлөөлдөг. Түүний нэг нь мэдээж кофе. Түүнчилэн тамхи таталт хорт зуршил
Шүдний өнгөө яавал хэвийн хадгалах вэ? Шүдний эмч нар танд жилдээ ядаж 2 удаа шүдээ мэргэжлийн түвшинд цэвэрлүүлэхийг зөвлөдөг. Мэдээж та өглөө бүр бас өдөр тэгээд орой шүдээ угааж байгаа. Гэвч мэргэжлийн цэвэрлэгээ гэдэг нь өөр юм. Таны шүдний сойзны үл хүрэх хэсгүүдийг багажаар, хэт авиагаар цэвэрлэдэг. Мэргэжлийн цэвэрлэгээний үр дүнд таны шүдний гадаргууд байх өнгөр, хүнсний будагч бодисууд, буйлны ховилд үүссэн шүдний чулуу арилна. Гэвч энэ бол зөвхөн шүдний гадаргуу дээр хийж буй ажилбар учир шүдний паалангийн гүнд нэвчсэн будагч бодис, өнгөний өөрчлөлтөнд нөлөөлөхгүй. Иймд паалангийн гүнд буй өнгөний өөрчлөлтийг химийн бодисоор үйлчилж цайруулдаг.
Мэргэжлийн түвшний шүд цайруулалтыг гэрийн нөхцөлд болон эмнэлгийн нөхцөлд цайруулах гэж 2 ангилдаг. Гэвч энэ 2 нь өөр хоорондоо тусдаа үйл ажиллагаа биш юм. Эмнэлгийн нөхцөлд тусгай зориулалтын гэрлийн тусламжтайгаар цайруулагч бодисыг паалангийн гүнд нэвчүүлдэг. Энэ үед цайруулалтын үр дүн шууд мэдрэгддэг. Энэхүү цайруулалтын үйлчилгээг хадгалахын тулд гэрийн нөхцөлд цайруулах бодисыг ашигладаг. Үүний тулд шүдний эмч тухайн хүнд зориулан шүдэнд нь таарах цайруулах халбага бэлдэж өгөх бөгөөд түүнд цайруулагч бодисоо хийн унтахдаа зүүдэг. Цайруулах халбагыг 5-10 удаа зүүх шаардлагатай.
Зарим хүмүүс гэрийн нөхцөлд цайруулах үйл ажиллагааг аптекиас шүд цайруулах бэлдмэл худалдаж аваад өөрөө хэрэглэх гэж ойлгодог. Гэвч аптек, гоо сайхны газруудад худалдаалж буй энэхүү цайруулах бэлдмэлийг эмчийн хяналтгүйгээр хэрэглэх нь цаашид хүндрэлд хүргэх боломжтой. Хүмүүс ойрхон давтамжтайгаар олон удаа хэрэглэвэл шүд илүү цайрна гэж ойлгодог. Гэвч үүний улмаас шүдний хэт мэдрэгшил болж шүд халуун хүйтэн зүйлд хага ташиж өвддөг. Иймд хэрэв та гэрийн нөхцөлд эмчийн хяналтгүйгээр шүдээ цайруулахыг хүсэж байгаа бол уг бэлдмэлийг 7 хоногт 2 удаа л хэрэглэхийг зөвлөж байна.
Гэхдээ шүдээ цайруулахдаа заавал эмчийн хяналтан дор хийлгэвэл илүү үр дүнтэй, тэгээд аюулгүй гэдгийг л ойлгох хэрэгтэй. Ямар нэг мэдрэгших шинж тэмдэг илэрвэл шүдний эмчид түүнийг дарах эм материалууд бий.
Дараах тохиолдлуудад шүд цайруулалтыг хийж болохгүй
-Шүдний хэт мэдрэгшил (Халуун, хүйтэн болон исгэлэн зүйл зэрэг гадны ямар нэг зүйлээс цочирч хаг ташиж хүчтэй өвддөг бол)
- Жирэмсэн эмэгтэйчүүд
-Хөхүүл эхчүүд
-Үүдэн шүдэндээ ломбо болон бүрээстэй бол
