Эрүү нүүр орчмын шүдний гаралтай буглаа гэж юу вэ?

Буглаа гэдэг нь нянгийн гаралтай халдварын улмаас хязгаарлагдмал орон зайд үүссэн идээ бээрийг хэлнэ. Хүний биед нянгийн гаралтай халдвар нэвтрэх үед биеийн дархлалын систем халдварыг зайлуулахын тулд тухайн хэсэгт цусны цагаан эсийг илгээдэг. Иймд идээт үрэвсэлийн дотор амьд ба үхсэн цусны цагаан эс, ферментүүд, үхэжсэн эд ба эсийн үлдэгдлүүд оршдог. Хэрэв энэхүү идээ бээр нь биеэс гадагшлах ямар нэгэн цорго байхгүй бол тэр хэсэгтээ хуримтлагдан буглаа болдог.

Буглаа нь аль ч хэсэгт үүсэж болно. Амны хөндийд бол буйлан дээр эсвэл сурвалжийн ёзоор орчим ба түүний орчны эдэд үүсдэг. Амны хөндийн буглаа нь гэмтэл (хоол хүнсний зүйл ба гадны биет буйлны гүнд шигдэн орох), шүдний цоорлын хөндийгөөс зөөлцрүү нэвтэрсэн эсвэл буйлны гүн ховилоос нэвтэрсэн нян бактериас шалтгаалан үүснэ. Хүний биеийн дархлалын ситемийн үйл ажиллагаа буурсан хүмүүст буглаа үүсэх магадлал илүү өндөр болно. Буглаа эхний үе шатандаа шүдний өвдөлт болон бусад хүндрэлүүдийг дагуулдаг. Шүдний зөөлц нянгийн халдварт бүрэн автаж, нян бактери түүшин ясыг нэвтлэн буйлан дээр үл мэдэг цоолон гарч ирнэ. Ийнхүү халдвар буйлыг цоолж амны хөндийд гарч ирмэгц өвдөлт мэдэгдэхүйц намжих боловч энэ нь шүдний эмчилгээ шаардлагагүй болсон гэсэн үг биш юм. Хэрэв буглаа амны хөндийн орчинд цорго үүсгэн нээгдэж чадахгүй бол толгой хүзүүний аль нэг хэсэгрүү тархан даамжирах бөгөөд үүний улмаас хүний амь насанд аюултай хүндрэл үүсгэж болзошгүй.

Шинж тэмдэг 

Буглааны гол шинж тэмдэг нь өвдөлт юм. Буглааны эхний үе шатанд шүд халуун зүйлээс эсвэл юм хазах үед хэт мэдрэг болж өвдөнө. Үүний зэрэгцээгээр үл мэдэг халуурч болох юм. Эрүүн доорх тунгалгийн булчирхайнууд цочирч томрон, хамрын дайвар хөндий орчмоор өвдөлт мэдрэгдэнэ. Хэрэв буглаа амны хөндийрүү цоорч гарч ирсэн бол өмхий үнэртэй, муухай амттай шингэн зүйл аманд мэдрэгдэнэ.

Оношилгоо 

Шүдний эмч амны хөндийн үзлэгээр буглаа үүссэн эсэхийг олж илрүүлнэ. Эмч буйлны орчим хавдсан хэсгийг тэмтэрч үзэж, зөөлцийг шалгах сорил хийнэ.

Зөөлцийг шалгах сорилд:

* Шүдэн дээр зөөлөн тогших

* Дулааны сорил

* Шүдний цахилгаан мэдрэг чанарыг шалгах сорил зэргийг хийнэ.

 

Явц 

Хэрэв буглааг мэс заслын аргаар нээж шалтгаан болж буй халдварыг гадагшлуулвал хэдхэн өдрийн дотор ямарч шинж тэмдэгггүй болж бүрэн эдгэрнэ. Харин шалтгаан болж буй хүчин зүйлийг арилгахгүй бол буглаа өөрөө тийм ч амар эдгэрэхгүй.

Урьдчилан сэргийлэлт 

Амны хөндийн эрүүл ахуйн дэглэмийг сахих нь буглаа үүсэхгүй байх үндсэн нөхцөл болно. Шүдний эмчийн үзлэгт цаг тухай бүрт нь хамрагдаж байх нь бас чухал. Хэрэв та ямар нэгэн эмчилгээ болон бусад шалтгааны улмаас дархлалын системийн үйл ажиллагаа суларсан бол энэ талаараа шүдний эмчдээ хэлж байгаарай. Тэгвэл шүдний эмч тань шүдний эмчилгээний өмнө танд антибиоток эмчилгээ хийх бөгөөд энэ нь бусад хүндрэл үүсэхээс урьдчилан сэргийлж өгнө.

Эмчилгээ 

Буглааны үндсэн эмчилгээ нь зүслэг хийн идээ бээрийг гадагшлуулах юм. Мөн шалтгаан болсон шүдэнд сувгийн эмчилгээ хийх хэрэгтэй. Түүнчлэн халдварын шалтгаан болж буй нян бактерийг устгахын тулд эмч тань антибиотик уухаар бичиж өгнө. Буглааг эмчилсэний 6 сарын дараа рентген зураг авхуулж яс ба орчмын эдийг хянуулах нь зүйтэй. Хэрэв ясны эд эмчилгээний дараа нөхөн төлжөөгүй байвал тулгуур эдийн эмчид хандаж мэс заслын аргаар нөхөн сэргээх ажилбар хийлгэх хэрэгтэй.

Тавилан 

Хэрэв шаардлагатай эмчилгээг цаг алдалгүй зүй зохистой хийж гүйцэтгэсэн бол буглаа болсон хэсэг бүрэн нөхөн төлжиж цаашдын хүндрэл үүсэхгүй.

 

 

Бусад мэдээ

Эрүү нүүр орчмын шүдний гаралтай буглаа гэж юу вэ?
Буглаа гэдэг нь нянгийн гаралтай халдварын улмаас хязгаарлагдмал орон зайд үүссэн идээ бээрийг хэлнэ. Хүний биед нянгийн гаралтай халдвар нэвтрэх үед биеийн дархлалын систем халдварыг зайлуулахын тулд тухайн хэсэгт цусны цагаан эсийг илгээдэг.
2020-08-19 08:17
Толгой хүзүүний хавдрын шинж эрт илэрдэг
Толгой хүзүүний байрлалын хавдруудад гавлын суурь хэсгээс эхлэн эгэм хооронд байрлах эрхтэнүүдийн хавдрыг хамааруулан эмчилдэг. Хамар болон түүний дайвар хөндийнүүд, амны хөндий үүн дотор хэл, буйл, завьж, хатуу тагнай, амны хөндийн ёроол хэсгийн хавдрууд, нармай, залгиур, төвөнх, хүзүүний тунгалагийн булчирхай, зөөлөн эдүүд, бамбай булчирхай, шүлсний булчирхайнууд гээд олон эрхтэний хавдрууд энд ордог. Үүн дээр арьсны хавдрууд мөн орно.
2020-07-25 15:03
Хэрэв шүдэнд идээт буглаа үүссэн бол яагаад шүдний эмчилгээг нэн даруй хийх шаардлагатай вэ?
Хэрэв шүдэнд идээт буглаа нэгэнт үүсэн л бол шүдний эмчилгээг аль болох түргэн хугацаанд хийлгэх хэрэгтэй. Энэ нь идээт халдварын голомтыг амны хөндийн бусад хэсэгрүү тархан халдварлахаас сэргийлнэ. Хэдийгээр шүдний буглаа үүсэх үед өвдөлт таагүй мэдрэмжийг хүн бүр мэдэрдэг боловч ямар нэгэн шалтгаанаар шүдний эмчид очилгүй алгуурласан байдаг. Зарим нэг нь гэрийн нөхцөлд түүнийг гэрийн аргаар намжаах гэж оролдсон байдаг ч тэр нь төдийлөн үр дүн өгөлгүй хүндрэх шатанд шилжиж өөрийн эрхгүй эмнэлэгт ирдэг.
2020-07-23 20:25